Rabbi Season: शेतकऱ्यांना दिलासा! फळपिक विमा योजनेत सहभागी होण्याची ‘ही’ आहे शेवटची तारीख

Pik Vima

रब्बी हंगामातील ज्वारी, आंबा, काजू, संत्रा आदी फळपिकांचा एक रुपयात पीकविमा भरण्यासाठी केंद्राकडून 30 नोव्हेंबर ही अंतिम मुदत देण्यात आली होती. मात्र आता ही मुदत वाढवण्यात आली असून आता 4 आणि 5 डिसेंबर या दोन दिवसात पिकांचा विमा भरता येणार आहे. त्यामुळे शेतकऱ्यांनी आपल्या पिकांचा विमा भरून योजनेत सहभाग घ्यावा, असे आवाहन कृषिमंत्री धनंजय मुंडे यांनी केले आहे.

कृषिमंत्री धनंजय मुंडे यांनी ट्वीटरव्दारे शेतकऱ्यांना याविषयी आवाहन केले आहे. ते म्हणाले की, रब्बी हंगामातील ज्वारीसह आंबा, काजू, संत्रा आदी फळपिकांचा पीकविमा भरण्याची अंतिम तारीख 30 नोव्हेंबर होती, मात्र काही शेतकरी विविध तांत्रिक अडचणींमुळे पीकविमा भरू शकले नाहीत, याचा विचार करून केंद्राकडे विनंती केली असता, दि. 4 व 5 डिसेंबर या दोन दिवसात वरील पिकांचा विमा भरता येणार आहे. उर्वरित शेतकऱ्यांनी आपल्या पिकांचा विमा भरून योजनेत सहभाग घ्यावा, असे आवाहन कृषिमंत्री धनंजय मुंडे यांनी केले आहे.

पिकांचा विमा भरण्याची मुदत 30 नोव्हेंबर रोजी संपली होती. मात्र पिक विमा पोर्टल मधील काही समस्यांमुळे विमा योजनेत भाग घेऊ इच्छिणारे शेतकरी योजनेत भाग घेण्यापासून वंचित राहिले होते. त्यांना भाग घेण्याची संधी देण्यासाठी कृषिमंत्री धनंजय मुंडे यांच्या विनंतीला केंद्र शासनाने मान्यता दिली आहे. त्यानुसार 4 आणि 5 डिसेंबर या दोन दिवसांसाठी पीक विमा पोर्टल पुन्हा सुरू करण्यात आले असून यामुळे शेतकऱ्यांना दिलासा मिळणार आहे.