भविष्यातील शेतीला यांत्रिकीकरणाशिवाय पर्याय नाही

सातारा: कृषी विज्ञान केंद्र, बोरगांव येथे 'कृषि यांत्रिकीकरण दिवस व शेतकरी शास्त्रज्ञ सुसंवाद रब्बी मेळावा 2019' हा कार्यक्रम संपन्न झाला. या कार्यक्रमाचे अध्यक्षस्थानी प्रा. मोहन शिर्के, कार्यक्रम समन्वयक तर प्रमुख पाहुणे म्हणुन सातारा जिल्हा मध्यवर्ती सहकारी बँक लि. साताराचे मुख्य कार्यकारी अधिकारी डॉ. राजेंद्र सरकाळे हे होते. यावेळी महात्मा फुले कृषी विद्यापीठ, राहुरी येथुन यंत्रे व अवजारे संशोधन विभागाचे प्रमुख प्रा. तुळशीदास बास्टेवाड हे आवर्जुन उपस्थित होते. यावेळी बोलतांना डॉ. सरकाळे यांनी विद्यापीठातील संशोधन प्रत्यक्ष बांधावर गेल्याशिवाय शेतकरी प्रगत होणार नसल्याचे मत व्यक्त केले. तसेच सातारा जिल्हा मध्यवर्ती बँक शेती व शेतीपुरक व्यवसायासाठी सदैव शेतकऱ्यांच्या पाठीशी उभी असुन बोरगांव येथील कृषी विज्ञान केंद्राचे तंत्रज्ञान प्रसारात महत्वाचे योगदान असल्याचे प्रतिपादन केले.

अल्पभुधारक शेतकऱ्यांना मजुरांच्या अभावामुळे शेती करणे जिकीरीचे होत आहे. यावर उपाय म्हणुन भाडेतत्वावर अवजारे केंद्र, गटशेती तसेच यांत्रिकीकरण हा एकमेव उपाय असल्याचे मत त्यांनी व्यक्त केले. प्रा. बास्टेवाड यांनी महात्मा फुले कृषि विद्यापीठ, राहुरी हे यांत्रिकीकरणात शेतकऱ्यांच्या गरजेनुरुप संशोधन करीत असुन त्याचा फायदा शेतकऱ्यांना नक्कीच होणार असल्याचा विश्वास व्यक्त करुन यांत्रिकीकरण दिवस साजरा करण्याची पार्श्वभुमी सविस्तर सांगितली. यावेळी कृषी अवजारे उत्पादक संघटनेचे उपाध्यक्ष श्री. प्रविण शेळके यांनी कृषी विद्यापीठ व उत्पादक संघटना यांच्या समन्वयाने गरजेनुरुप अवजारे निर्माण करणे सुलभ झाल्याचे मत व्यक्त केले. अध्यक्षीय मार्गदर्शन करतांना प्रा. मोहन शिर्के यांनी यांत्रिकीकरण ही काळाची गरज असल्याने असे दिवस साजरे केल्याने शेतकऱ्यांना फायदा होणार असल्याचे मत व्यक्त केले.