Pomegranate Crop Insurance : डाळिंबासाठी पीकविमा योजना, जाणून घ्या सविस्तर माहिती

Crop Insurance Scheme

विनयकुमार आवटे

डाळिंब पीक विमा योजना औरंगाबाद, जालना, सांगली, सातारा, सोलापूर, नाशिक, पुणे, उस्मानाबाद, बुलढ़ाणा, धुळे, जळगाव, लातूर, बीड, अहमदनगर, वाशिम, परभणी,अकोला,हिंगोली या १८ अधिसुचित जिल्हा , तालुक्यातील अधिसूचित महसूल मंडळात लागू आहे. या जिल्ह्यात शासनामार्फत अधिसूचित महसूल मंडळ पातळीवर असलेल्या शासकीय हवामान केंद्र आकडेवारी वरून नुकसान भरपाई अंतिम केली जाते.

या योजनेतंर्गत डाळिंब २ वर्ष वय पूर्ण असलेल्या उत्पादन देणाऱ्या पिकास निवडलेल्या विमा कंपनी मार्फत खाली नमूद केलेल्या विमा संरक्षण कालावधीत निवडक हवामान धोक्यामुळे होणाऱ्या संभाव्य पिक नुकसानीस(आर्थिक)खालील प्रमाणे विमा संरक्षण प्रदान होईल.

डाळिंब विमा पिकासाठी भाग घेण्याचा अंतिम दिनांक :- १४ जानेवारी २०२४
शेतकर्‍यांसाठी विमा हप्ता
हवामान धोके - विमा संरक्षित रक्कम रुपये प्रती हेक्टर- शेतकर्‍यांसाठी विमा हप्ता रुपये प्रती हेक्टर
जास्त तापमान, जास्त पाऊस - १,३०,००० - ६५०० ते २८,६००
गारपीट - ४३,३३३ - २१६७

योजना कार्यान्वित करणारी यंत्रणा
जिल्हे - विमा कंपनीचे नांव व पत्ता
१) अहमदनगर, अमरावती, सिंधुदुर्ग, नाशिक, वाशिम, यवतमाळ, धुळे, पालघर, सोलापुर, रत्नागिरी, नागपूर, नंदुरबार - रिलायन्स जनरल इन्शुरन्स कंपनी लि.
२) बीड, औरंगाबाद अकोला, सांगली, वर्धा, ठाणे, हिंगोली, सातारा, परभणी, जालना, लातूर, कोल्हापूर - एचडीएफसी एर्गो जनरल इन्शुरन्स कं. लि
३) रायगड, बुलढाणा, जळगाव, नांदेड, पुणे, उस्मानाबाद - भारतीय कृषि विमा कंपनी लिमिटेड

शेतकर्‍यांचा योजनेतील सहभाग
१) या योजनेत अधिसुचित क्षेत्रात, अधिसुचित फळपिकासाठी कुळाने, भाडेपट्टीने शेती करणाऱ्या शेतकऱ्यांसहित इतर सर्व शेतकरी भाग घेवू शकतात. मात्र भाडेकरार नोंदणीकृत असणे आवश्यक आहे .
२) पीककर्ज घेणाऱ्या आणि बिगर कर्जदारांसाठी योजनेतील सहभाग ऐच्छिक राहणार आहे.
३) बिगर कर्जदार शेतकरी विहित मुदतीत बँकेत विमा हप्ता जमा करुन सहभाग घेवू शकतात. त्यासाठी , आधार कार्ड, जमीन धारणा ७ /१२ , ८(अ) उतारा व पिक लागवड स्वयंघोषणा पत्र , फळबागेचा(Geo Tagging) केलेला फोटो , बँक पासबूक वरील बँक खाते बाबत सविस्तर माहिती लागेल.कॉमन सर्विस सेंटर मार्फत अर्ज ऑनलाइन भरता येतील.
४) एक शेतकरी त्याच्याकडे एकापेक्षा अधिक फळपिके असल्यास योजना लागु असलेल्या पिकांसाठी तो विमा योजनेत सहभाग घेवू शकतो (मात्र त्या फळपिकासाठी ते महसुल मंडळ अधिसुचित असणे आवश्यक आहे)

५) शेतकरी मृग किंवा अंबिया पैकी एका बहारात भाग घेऊ शकतो.
६) एक शेतकरी ४ हेक्टर च्या मर्यादेत विमा संरक्षण घेवू शकतो.
७) शेतकऱ्यांसाठी विमा हप्ता, विमा संरक्षित रकमेच्या ५ % च्या मर्यादेत असतो. याहून अधिकचा हप्ता केंद्र व राज्य शासनाकडून अनुदान म्हणून म्हणून देण्यात येतो. मात्र विमा हप्ता ३५% पेक्षा जास्त असल्यास शेतकर्‍याला ५% पेक्षा जास्त विमा हप्ता भरावा लागतो.
८) या विमा योजनेअंतर्गत हवामान धोक्याच्या ट्रिगर कार्यान्वित झाल्यास त्या महसुल मंडळातील त्या पिकासाठी भाग घेतलेल्या शेतकऱ्यास नुकसान भरपाई रक्कम संबंधित विमा कंपनीकडून देण्यात येणार आहे.
अधिक माहितीसाठी शेतकऱ्यांनी आपल्या संबंधित विमा कंपनी किंवा संबंधित तालुका कृषी अधिकारी कार्यालयाकडे संपर्क साधावा.

लेखक - विनयकुमार आवटे, कृषी सहसंचालक (विस्तार व प्रशिक्षण), म.रा. पुणे -५
ई-मेल - avinaykumar.30@gmail.com