दर आंदोलन : स्वाभिमानीने टँकर फोडून हजारो लीटर दूध रस्त्यावर सोडलं

राज्यात कालापासून दूध दरवाढीवरुन राजकारण तापले आहे. दरवाढीसाठी चालू असून काल शेतकरी संघटना आणि विरोधी पक्षांनी आंदोलन केले होते. आज स्वाभिमानी शेतकरी संघटनेच्या दूध दर आंदोलनाला सांगली जिल्ह्यात सुरुवात झाली केले. पुणे-बंगळुरु महामार्गावरील वाळवा तालुक्यातील येलूर फाट्याजवळ स्वाभिमानी शेतकरी संघटनेच्या कार्यकर्त्यांनी पहाटेच्या सुमारास गोकुळ दूध संघाचा टँकर फोडला. हा टँकर गोकुळ दूध संघाचा असून 25 हजार लिटर दूध घेऊन मुंबईला जात होता.

स्वाभिमानीच्या आंदोलनाला पाठिंबा म्हणून दूध संकलन बंद ठेवण्याचा निर्णय घेतल्याने दुग्ध विभागाने गोकुळ दूध संघाला नोटीस पाठवली होती. या नोटीसनंतर गोकुळ दूध संघाने स्वाभिमानीच्या दूध आंदोलनाला दिलेला पाठिंबा मागे घेत सकाळचे दूध संकलन आणि दूध वाहतूक सुरु ठेवली होती. त्यानंतर स्वाभिमानाच्या कार्यकर्त्यांनी नेमके गोकुळच्या टँकरला लक्ष्य केले आहे.

Photo- ANI

स्वाभिमानी शेतकरी संघटनेने आज दूध दर वाढीसाठी राज्यभर आंदोलनाची हाक दिली आहे. गायी आणि म्हशीच्या दुधाला प्रति लिटर दहा रुपये वाढ मिळावी, केंद्र सरकारने दूध भुकटी आयात निर्णय बदलावा, यासह विविध मागण्यांसाठी हे आंदोलन पुकारण्यात आले  आहे. या आंदोलनाची सुरुवात सांगली जिल्ह्यात आक्रमक पद्धतीने झाली. स्वाभिमानी शेतकरी संघटनेचे जिल्हाध्यक्ष महेश खराडे यांच्या नेतृत्वाखाली पुणे-बंगळुरु हायवेवर येलूर फाटा इथे आंदोलन करण्यात आले. सकाळी सहाच्या सुमारास दूध टँकर अडवून हजारो लिटर दूध रस्त्यावर सोडण्यात आले. कोल्हापूर जिल्ह्यातील गोकुळ दूध संघाचा हा टँकर मुंबईकडे निघाला असता, स्वाभिमानीच्या कार्यकर्त्यांनी गनिमी काव्याने हा टँकर अडवला. यानंतर टँकरचे सील तोडून दूध रस्त्यावर सोडलं आणि जोरदार घोषणाबाजी केली.